--------------------------------------------------------------------------------
يا عراقي يلي تبريت من الجنسيه العراقيه ومن أهلك وبلدك , شوف شنوه العراق لعد :
وما أنت وحيد , إنت الشعب كله بشيعته وسنته
منهو إلي كالك ناسيك , هم ينسه الكمر وكته
لو نبض الكلب يتنكر لدكته
بس عشكك عشك مفضوح , وعشك الناس كلها مساتر وسكته
صرت إنت سبت وبركبه يهودي , هم شايف يهودي يجوز من سبته
------------------------------
إنت الفارس إلي يسبق هبوب الريح , وما ظل خيل سابقته
وإنت اليرهم ترابك كحل للعين , ودول اللي ما شفت علته
ومن طينك نحني جفوف المعرسين , وكل إصبح فرح من طينتك
وإنت الريحه ترابك ترد الروح , هيل وزعفران وعنبر بشمته
ومثل تراب كاعك ما لكينه تراب , يرهم للصلاة من طينته تربته
-------------------------------
إنت ينام بيك المرتضى الكرار أبو الحسنين , إلي تلوذ الناس كلها بشارته وبخته
وإنت ينام بيك بكربلاء حسين , إلي ما بايع الطاغي ودنك ركبته
وإنت إلي بيك ظلت شارة العباس , لمن طاح دنكله الفرات وباسه من شفته
-------------------------------
من طلعت منك يمطرني البين , كلبي وياي ما جبته
أثاريني نسيته هناك , عندك كلبي أمنته
شتلته بجرف دجله الخير , وي سباح الشواطي شربك تبده
وإمتدن عروكه بوسط ذيج الكاع , وبماي الفرات ودجله عمدته
ولمن صار ينكل جدمه بين الناس , أخذته وياي للكاظم على الشباج زورته
---------------------------------
صح هسة أصبحت من وطن نيذرلاند, هولنديه الهوية وشعري جللته
وصح تأقلمت ويه الغرب فد نووب , وصرت ماصخ مثلهم والملح عفته
وصح كمت أرطن رطنهم لمن يرطنون , ولسان العرب بالأعجم كسرته
لكن , لكـــن مدري شنهي يصير بيه لمن يمر طاريك , أحسنك دفو تموز وسط شته
وأثاريني مثل طبع النخل لو طال , يرجع للأصول وتنحني سعفته
------------------------------------
العالم نسه يوم 11 من أيلول , صارت بيك سالفته
ناس تكول لازم نحتويه ونشفط البترول , ونعوض الراح ونسرق بركته
وناس تكول لازم هالحصار يدوم , وناس تكول لازم ننزع أسلحته
وناس تكول خطيه أطفاله ماتوا من الجوع , وناس تكول حيل وياه ما حمد ربه وشاكر نعمته
وإنت بين هذا وذاك صاير شبح لليهويك , ياخذ كاع وضدك سدد تفكته
-------------------------------------
جي لأنك حلو والدول منه تغار , ما عدهم العندك والمجد نلته
إنت أول وطن آدم وضع جدمه عليه وكال يا الله لأنك وصله من جنته
وإنت أول وطن حبه النبي إبراهيم , ودعا ربه يصونه برحمته وعزته
وإنت أول وطن مرسى لسفينه نوح , ونبي آيوب ناخت بيك راحلته
وإنت أول وطن علم العالم أبجديه ويكتب التاريخ
وإنت أول وطن قانون سننته
وإنت أول وطن كالتله الشمس يمه صباح الخير
ولو رادت تمسي , تمسي يم كبته
وإنت أول وطن ما تشبه الأوطان , مدري شلون ربك خالقه سبحان ربي شلون صورته
صورته العراق وبس علينا يلوك , وإحنا نلوكله لمن وطنما بس علينا ينده
تحياتي وسلامي للكل
التوقيع : عاشقه ماجد المهندس
موضوع: ياعراقي يلي تبريت من الجنسيه العراقيه 
الأربعاء فبراير 20, 2008 5:35 pm
